O aviso produciuse arredor das 5:00 horas, cando un traballador accedeu ao interior da nave, dedicada ao transporte e situada na rúa Pazos de San Clodio, e percibiu un lixeiro cheiro a queimado. A nave pertence á empresa de transportes Ges Pereiro, onde se orixinou o lume, supostamente relacionado cun depósito de gasóleo.

Ata o lugar desprazáronse efectivos dos Bombeiros de San Cibrao e dos Bombeiros de Ourense, que traballaron de forma coordinada para sufocar as chamas. Tamén interviñeron axentes da Garda Civil e deuse aviso ao servizo de Medio Rural, que trasladou unha motobomba para apoiar os labores de extinción.

En total, mobilizáronse ata sete vehículos de bombeiros, logrando dar por controlado o incendio tras unha intensa intervención. Polo momento, investíganse as causas exactas do suceso.