A agresión a un técnico de emerxencias sanitarias na provincia de Ourense saldouse nos xulgados cunha condena de seis meses de cárcere para o agresor. Tras un acordo de conformidade, o acusado aceptou a pena por un delito de atentado, xa que o persoal sanitario está considerado axente da autoridade.
Os feitos ocorreron o 29 de outubro de 2023, cando o técnico se desprazou ao aparcadoiro do Karaoke Rías Baixas para asistir ao inculpado, Norlan L.T.M.O., quen se atopaba baixo os efectos do alcol. Unha vez na ambulancia, xurdiu un enfrontamento entre o acusado e unha terceira persoa. Ao intentar pacificar a situación, o profesional sanitario recibiu un forte puñetazo na mandíbula.
As agresións ao persoal sanitario continúan sendo unha das queixas máis recorrentes dentro do sector.
Como consecuencia do impacto, o técnico sufriu unha contusión mandibular e unha contractura muscular cervical, que lle impediron realizar as súas funcións habituais durante 30 días. No momento da agresión, o acusado non tiña antecedentes penais e presentaba unha intoxicación alcohólica grave, o que foi considerado unha circunstancia atenuante no proceso xudicial.
A resolución final establece, ademais da pena de prisión, o pago dunha multa de 120 euros e unha indemnización de 1.650 euros á vítima en concepto de responsabilidade civil. A xuíza da Praza 1 da Sección Penal do Tribunal de Instancia de Ourense mostrouse favorable á suspensión da pena, pero advertiu ao acusado que o impago da responsabilidade civil ou a reincidencia nos próximos dous anos poderían implicar o seu ingreso en prisión.
