Veciñas de todas as idades están convocadas a participar nunha xornada creativa que busca ser un espazo para "crear libremente, e deixar pegada, ao mesmo tempo que celebrar a diversidade e forza das mulleres", segundo explicou o alcalde, Xosé Carlos Valcárcel. A actividade comezará ás 10:30 horas e está aberta a todas as mulleres, independentemente da súa experiencia en pintura ou muralismo.
Esta iniciativa forma parte do Programa Luz Pozo Garza, que continuará esa mesma tarde, ás 19:00 horas, cunha charla sobre estratexia dixital e o uso da intelixencia artificial para a busca de emprego. Esta sesión terá lugar no local da Asociación Veciñal das Lamas.
O programa tamén inclúe outras actividades nas xornadas seguintes. O xoves 24 de setembro, haberá un encontro no Fonval ás 17:00 horas para abordar as oportunidades da idade nas mulleres. Posteriormente, o martes 29 de setembro, as veciñas de Loiro poderán participar na charla "Os cartos tamén son cousa nosa: economía e finanzas para as mulleres" ás 18:00 horas no local da Asociación Veciñal San Martín de Loiro.
O Programa Luz Pozo Garza conta co financiamento do Fondo Social Europeo e da Xunta de Galicia, e está deseñado para mulleres de todas as idades que se atopen en situación de especial vulnerabilidade.
