O colectivo ecoloxista Amigas das Árbores denunciou hoxe a inacción e a "manifesta incompetencia" da Xunta de Galicia e doutras administracións ante as graves consecuencias dos incendios forestais do verán de 2025. Estes lumes arrasaron máis de 150.000 hectáreas, segundo datos do sistema europeo EFFIS Copernicus, e xeraron os problemas de escorrentías de lama, auga e cinzas que afectaron este mércores a zonas da montaña de Ourense e Lugo, danando estradas.
A asociación sostén que as políticas de "deixar facer, deixar pasar" do Goberno galego permitiron a corta de madeira queimada sen control nin prego técnico, ignorando recomendacións de Medio Rural e Medio Ambiente. Este feito, segundo o colectivo, intensificou os efectos das escorrentías tras fortes choivas.
“"As súas peticións de finais de agosto do pasado ano para convocar de urxencia o Consello Forestal de Galicia recibiron o silencio por resposta."
Amigas das Árbores critica ademais que se ignorasen as súas demandas para cumprir coas leis galegas de montes, de prevención de incendios e de Augas, co obxectivo de restaurar os ecosistemas danados polos lumes.
O colectivo acusa directamente á Xunta de Galicia, ás Deputacións, aos Concellos e ás Confederacións Hidrográficas do Miño-Sil e do Douro de incumprir a súa propia lexislación. Conclúen que esta falta de xestión para frear a erosión e protexer os acuíferos derivou en graves danos ambientais e materiais nas aldeas e infraestruturas.
Este mércores, numerosas zonas de montaña de Ourense e Lugo sufriron fortes choivas. Carballeda de Valdeorras rexistrou a maior acumulación con 31 litros por metro cadrado, seguida por Sober (29 litros/m²). En Viana do Bolo, algunhas estradas quedaron intransitables polas escorrentías.
