A xornada deste martes estivo marcada por unha intensa onda de calor en Galicia, con varias localidades da provincia de Ourense superando os 42 graos centígrados. A cidade de Ourense alcanzou os 42,5 graos, mentres que Arnoia rexistrou 42,4 graos. Tamén se superaron os 41 graos en Leiro, Salvaterra de Miño e Vilamartín de Valdeorras.
Debido a estas condicións extremas, activouse a alerta vermella por altas temperaturas na zona do Miño ao seu paso por Ourense. Ademais, boa parte do resto da provincia ourensá e a provincia de Pontevedra atópanse en alerta laranxa.
Para este mércores, espérase unha lixeira diminución da intensidade do episodio de calor. Non haberá ningunha zona en nivel vermello, aínda que se manterá a alerta laranxa na comarca de Valdeorras. As temperaturas máximas nas principais cidades galegas oscilarán entre os 36 graos previstos para Ourense e os 25 graos da Coruña.
