Segundo as predicións remitidas por MeteoSalud e MeteoGalicia, e no ámbito do Plan de Actuacións da Xunta de Galicia fronte aos posibles efectos das altas temperaturas, para mañá sábado mantense o sistema de alerta por episodio de calor nas seguintes zonas isoclimáticas:
- Nivel 1 (amarelo): montaña de Lugo, noroeste de Ourense e Miño de Ourense.
- Nivel 2 (laranxa): interior de Pontevedra e Valdeorras.
No que atinxe á práctica deportiva, recoméndase á organización das probas que adapte os horarios ás condicións específicas de cada zona, tomando as medidas preventivas necesarias para minimizar o impacto das altas temperaturas na saúde e que, ademais, se garanta a protección dos deportistas e do público asistente.
O mapa da Dirección Xeral de Saúde Pública, xunto coas recomendacións e o Plan de Actuacións da Xunta de Galicia fronte aos posibles efectos das altas temperaturas están dispoñibles na web do Sergas.
Para elaborar o mapa de riscos para a saúde provocados polas altas temperaturas, a Consellería de Sanidade ten en conta os datos rexistrados por Meteogalicia e por Meteosalud. Meteogalicia considera as temperaturas máximas e mínimas diarias e os límites establecidos para episodios de calor. Pola súa banda, Meteosalud analiza series temporais de temperatura e mortalidade dos últimos 20 anos. A Consellería de Sanidade establece o nivel de alerta combinando estes datos, polo que os mapas poden non coincidir.
Os principais grupos de risco ante os efectos da calor son: persoas maiores de 65 anos e menores de catro anos, sobre todo as menores dun ano; persoas con patoloxías cardiovasculares, diabetes, enfermidade pulmonar obstrutiva crónica, insuficiencia renal, párkinson, Alzheimer ou enfermidades psiquiátricas; e persoas que toman certos fármacos como diuréticos ou con efecto anticolinérxico, ademais de consumo importante de alcol. Tamén son grupos de risco os maiores que viven sós, persoas en vivendas mal acondicionadas, con exceso ou peso insuficiente, traballadores, deportistas ou quen pasa moitas horas ao aire libre.
A Consellería de Sanidade lembra consellos xerais: beber máis líquidos (auga, zumes) sen esperar a ter sede, evitar bebidas quentes, alcohólicas, café, té ou cola e moi azucradas. Aumentar o consumo de ensaladas, verduras e froitas, evitar comidas copiosas, comer menos cantidade e máis veces. Manter os alimentos no frigorífico e vixiar a hixiene.
Recoméndase usar roupa de tecidos naturais, lixeira e folgada, de cores claras, sombreiro, lentes de sol e cremas protectoras solares, ademais de calzado fresco e cómodo. Permanecer en espazos ventilados ou acondicionados, á sombra, e ventilar a vivenda nas horas de menos calor, manténdoa fresca durante o día. Evitar actividades ao aire libre nas horas de máis calor e reducir a actividade física. Nunca deixar nenos ou anciáns no coche coas xanelas pechadas.
En caso de esgotamento ou golpe de calor, solicite axuda médica urxente chamando ao 061. É importante facer seguimento especial a parentes ou veciños que vivan sós.
Os concellos que pertencen a cada zona isoclimática son os seguintes:
- Noroeste da Coruña
- Interior da Coruña
- Oeste da Coruña
- Suroeste da Coruña
- A Mariña
- Centro de Lugo
- Montaña de Lugo
- Sur de Lugo
- Noroeste de Ourense
- Miño de Ourense
- Valdeorras
- Montaña de Ourense
- Sur de Ourense
- Interior de Pontevedra
- Litoral de Pontevedra ou Rías Baixas
- Miño de Pontevedra
