O escrito provisional da acusación particular atribúe ao rexedor presuntos delitos de malversación apropiatoria agravada, falsidade en documento oficial e prevaricación administrativa. Por este último, solicítanse 13 anos de inhabilitación para emprego e cargo público. Por malversación agravada, a petición ascende a 7 anos de prisión e 17 de inhabilitación absoluta. Pola falsidade, pídese 4 anos e medio de cárcere, unha multa de 108.000 euros e 5 anos de inhabilitación especial.
Ademais das penas de prisión e inhabilitación, o denunciante reclama unha indemnización de polo menos 491.025,72 euros a favor do Concello e da Deputación de Ourense. A acusación particular tamén solicita a apertura dunha peza separada de responsabilidade civil e a prestación dunha fianza por parte do investigado.
“"É só unha manobra, sen visos de prosperar, para acaparar atención e titulares."
A acusación céntrase en que, desde xuño de 2019, o rexedor cobrou o seu salario público con dedicación exclusiva, de máis de 70.000 euros brutos anuais, mentres mantiña a súa actividade empresarial privada. Segundo a documentación tributaria, a facturación bruta acumulada polas súas actividades particulares entre 2019 e o terceiro trimestre de 2025 alcanzaría unha gran contía económica, con exercicios como 2020 (218.041 euros) ou 2023 (138.228 euros) de especial relevancia.
O escrito de acusación tamén denuncia discrepancias entre as declaracións do investigado ante os rexistros públicos e as súas declaracións tributarias. Mentres que no rexistro da Deputación declarou supostamente só un piso e unha herdanza, o documento de IRPF do mesmo exercicio reflectiu presuntamente 15 inmobles, cifra que ascendeu a 19 propiedades en 2024.
