Calvo cualificou a decisión do Ministerio de Transportes de non rematar as obras da variante do AVE en Ourense como unha "tomadura de pelo" para todos os galegos. En declaracións aos medios esta mañá, o conselleiro expresou o "asombro" de todo o Goberno galego ante esta determinación.
“"Levamos moito tempo pedíndolle ao Ministerio que sexa claro coas obras, que sexa claro cos prazos. Levamos moito tempo denunciando o que criamos que era un adiamento constante e indefinido de moitas desas obras e agora, por fin, vai recoñecendo o Goberno que, efectivamente, no caso da variante de Ourense, hai unha parte desa variante que non teñen pensado levala a cabo, xa que consideran que non reduce os tempos significativamente. Asómbranos ter esa resposta."
O conselleiro lembrou que ADIF sempre argumentara que estaban a resolver "papelorio" e que a actuación seguiría adiante, a pesar dos atrasos acumulados. A Xunta insiste en que a cuestión non é só aforrar tempo nas viaxes, senón garantir a "integración" da chegada do tren á cidade de Ourense e evitar "pescozos de botella" que xerarían manter un tramo en vía única, afectando tanto ao AVE como ao tráfico de mercadorías.
Calvo subliñou a necesidade de executar todos os tramos previstos para a chegada do AVE a Galicia e instou ao Goberno central a non "tomarlle o pelo" á Xunta nin aos galegos, que levan "moito tempo esperando e escoitando desculpas que non tiñan sentido".
Por outra banda, e en relación cun posible recurso da Xunta ao decreto de regularización de migrantes, o conselleiro indicou que se están a avaliar todas as posibilidades e que a decisión aínda non está tomada, pero que se anunciará nos próximos días.
