O mural, que celebra a figura de Clara Campoamor, deputada, sufraxista e referente feminista, foi creado esta mañá no marco do Programa Luz Pozo Garza. Veciñas de Barbadás e mulleres do Centro Ocupacional As Burgas participaron activamente na súa elaboración.
Xosé Carlos Valcárcel, alcalde de Barbadás, acompañado polo tenente alcalde e concelleiro de Igualdade, Daniel Rey, destacou que o programa busca o empoderamento das mulleres en situación de vulnerabilidade. "Este programa ten por obxectivo o empoderamento das mulleres en situación de especial vulnerabilidade en zonas do rural e da zona urbana de Barbadás a través de obradoiros e encontros nos que se abordan aspectos psicolóxicos, laborais e creativos", explicou.
A artista Tareixa Taboada guiou o proceso creativo, expresando a súa honra por participar nun proxecto que reivindica as voces femininas na literatura e na política. "É moi importante seguir traballando pola igualdade e integrar a voz de todos os colectivos de mulleres, como neste caso, as usuarias do centro As Burgas", afirmou.
A obra inclúe unha representación de Clara Campoamor xunto a un fragmento do seu emblemático discurso: "A liberdade apréndese exercéndoa", en defensa do voto feminino.
O Programa Luz Pozo Garza continuará hoxe ás 19:00 horas cunha charla sobre estratexia dixital e intelixencia artificial para a busca de emprego na Asociación Veciñal das Lamas.
