A cita, organizada pola Asociación de Veciños San Felipe de Balgos coa colaboración da Xunta de Galicia, terá lugar no lugar de Balgos. O delegado territorial en Lugo, Javier Arias, participou na presentación do evento, subliñando a súa importancia para o dinamismo do rural.
“"Este evento é un exemplo do dinamismo do rural lucense e do compromiso da veciñanza por manter vivas as súas tradicións, ademais de promocionar a produción local e xerar actividade social e económica no territorio."
A programación comezará ás 13:00 horas co pregón a cargo de Román Sánchez Besteiro, xerente da cooperativa A Carqueixa. Seguidamente, celebrarase a cata de viños, na que participarán unha ducia de 'colleiteiros' da zona dos Ancares, presentando as súas elaboracións caseiras do ano.
Ás 15:00 horas haberá un xantar popular e, pola tarde, procederase á entrega de premios aos mellores viños da xornada. O programa complétase con actividades para todos os públicos, incluíndo xogos inchables para os máis pequenos e un campionato de lanzamento de boina a partir das 17:00 horas, ademais da animación musical do dúo Son de Festa.
O evento tamén servirá para render homenaxe a Dositeo Fernández García, coñecido como 'Teín', quen foi secretario da asociación veciñal e un dos principais impulsores tanto desta cata como da promoción do viño elaborado no municipio.
