O proxecto de divulgación ambiental “Birding Ortegal” xa está en marcha no Concello de Ortigueira tras obter a aprobación da Consellería do Mar para unha axuda autonómica. A iniciativa, enmarcada na Estratexia de Desenvolvemento Local Participativo do Grupo de Acción Local do Sector Pesqueiro (GALP) 1 A Mariña – Ortegal, conta cun financiamento do 100% público, cofinanciado polo Fondo Europeo Marítimo, de Pesca e de Acuicultura (FEMPA), cunha inversión total de 49.005 euros.
A xornada inaugural contou coa presenza das concelleiras de Cultura, Ana Cartelle, e Promoción Económica, Isabel Rego. A mostra itinerante está composta por oito paneis divulgativos con códigos QR que amplían información sobre as especies, hábitos e valores ornitolóxicos da ría de Ortigueira e Ladrido. Esta exposición permanecerá en puntos clave do municipio para achegar o patrimonio natural a veciños e visitantes.
Ademais da exposición, o proxecto desenvolve unha unidade didáctica dixital dirixida ao terceiro ciclo de Educación Primaria. Este material pedagóxico interactivo sobre as aves locais estará dispoñible na web municipal e servirá de base para o futuro Centro de Interpretación das Aves do municipio.
O plan de traballo tamén contempla saídas de campo escolares, mantendo o foco nos instrumentos divulgativos dixitais e itinerantes.
