O equipo de deseño e manufactura de foguetes da UVigo Aerotech Solaris dá o salto á competición no certame L1, organizado por Surt e SpainRocketry, que se desenvolverá en Alcolea de Cinca (Huesca). Alí, estudantes universitarios de diferentes puntos de España competirán con foguetes de alta potencia deseñados, construídos e lanzados por eles mesmos. O Viradinha MkII, o único foguete galego presente, tentará acadar a certificación oficial L1 de Tripoli.
O equipo Solaris, que comezou a súa actividade no curso 2024/2025, está formado por 36 estudantes de diferentes graos dos campus de Ourense e Vigo. A participación nesta competición, aprazada de xullo a novembro, enche de orgullo ao equipo por ser o único galego presente. A cita, que será a primeira competición de foguetería celebrada en España, contará con seis equipos participantes e agárdase a asistencia de entre 70 e 80 persoas.
A competición L1 busca fomentar a colaboración e a aprendizaxe entre os equipos universitarios. O Viradinha MkII ten 1.23 metros de lonxitude, aviónica con telemetría, un apoxeo estimado de 400-500 metros, masa total de 1.6 kg, velocidade máxima de 470 km/h e un tempo de voo de 1 minuto. Ademais do lanzamento, o alumnado presentará un proxecto técnico e traballará aspectos de organización, seguridade e deseño.
O principal reto de Solaris é obter a certificación L1 de Tripoli, que acredita a capacidade para realizar lanzamentos seguros. Tamén buscan probar a súa aviónica en voo. Esta participación serve de preparación para o EuRoC (European Rocketry Challenge) de 2027.
O estudantado traballa organizado en departamentos: dinámica e control, aviónica, aeroestruturas e propulsión. O obxectivo principal da iniciativa é que o alumnado adquira coñecementos desenvolvendo un proxecto real nas súas diferentes fases. Solaris agradece o apoio da Universidade de Vigo, Coasa, Marine Instruments, Axencia Galega de Innovación (GAIN), atlanTTic, Aeromedia e CATEC.
