A cita, que se estende ata o vindeiro domingo, conta co apoio da Xunta de Galicia a través de Turismo de Galicia e está integrada nos Concertos do Xacobeo. A organización estima unha afluencia superior ás 100.000 persoas, mantendo a súa traxectoria de case medio século como punto de encontro para as tradicións celtas.
A programación desta edición combina artistas de prestixio internacional con novas propostas emerxentes. Ademais dos concertos principais, a vila acolle obradoiros, pasarrúas, exposicións e actividades na denominada Vila Celta, fomentando a participación activa do público e o relevo xeracional a través de iniciativas como o Concurso Runas.
Como novidade nos grandes eventos musicais do verán, o festival dispón de puntos de información e sensibilización da Xunta. Estes espazos teñen como obxectivo previr situacións de violencia contra as mulleres e o colectivo LGTBI, garantindo un ambiente seguro para a mocidade e o resto da cidadanía.
