O acordo, publicado este mércores no Boletín Oficial da Provincia (BOP), reflicte un incremento respecto ás contas do ano anterior. As previsións iniciais para 2026 superan os 1,4 millóns de euros, fronte aos 1.383.667,27 euros de 2025, o que consolida unha liña de estabilidade económica e continuidade na xestión dos recursos públicos.

No capítulo de gastos, a maior parte do orzamento destínase a gastos correntes en bens e servizos, cun total de 690.322,04 euros, e ao capítulo de persoal, que suma 628.452,36 euros. Esta distribución garante o funcionamento óptimo dos servizos municipais esenciais para a cidadanía.

Ademais, as contas municipais reforzan a planificación de investimentos no municipio. Destínanse preto de 100.000 euros de recursos propios que, xunto coa captación de subvencións doutras administracións, permitirán mobilizar máis de 1,2 millóns de euros para o desenvolvemento de diversos proxectos. En canto aos ingresos, o financiamento do Concello de Cerdido apóiase fundamentalmente nas transferencias correntes, que superan o millón de euros (1.074.709,46 euros), mentres que os ingresos propios, procedentes de impostos e taxas, achegan 323.925,08 euros.

O anexo do documento orzamentario inclúe tamén a relación de persoal municipal, tanto funcionario como laboral. Cómpre salientar os sete postos de traballo do Servizo de Axuda no Fogar, un servizo considerado clave na atención aos veciños e no sostemento das políticas sociais de Cerdido.