O deputado provincial Antonio Leira destacou que esta iniciativa, impulsada pola Deputación da Coruña coa colaboración da Asociación de Concellos do Camiño Inglés, da Asociación de Concellos do Camiño Fisterra-Muxía e dos concellos implicados, busca integrar a arte urbana nas rutas xacobeas, reforzar a identidade local e enriquecer a experiencia de peregrinos e veciñanza.
Entre 2024 e 2026, pintáronse catorce murais en concellos como Miño, Paderne, Culleredo, Carral, Abegondo, Mesía, Ordes e Oroso (no Camiño Inglés), e en Negreira, Mazaricos, Dumbría, Cee, Corcubión e Fisterra (no Camiño Fisterra-Muxía).
Antonio Leira sinalou que "esta terceira edición pecha un percorrido de catorce murais que xa forma parte da paisaxe do Camiño", agradecendo o traballo dos artistas Twee Muizen, Sokram, Agustina Shuan, Sekone e María Martelo. O deputado reiterou o compromiso da Deputación no apoio a proxectos que "fortalezan o carácter cultural das rutas xacobeas e dean visibilidade ao talento artístico".
Nas presentacións participaron alcaldes e concelleiros dos municipios implicados, así como representantes das asociacións do Camiño Inglés e Fisterra-Muxía, e da asociación de veciños de Buscás.
En Mazaricos, Twee Muizen homenaxea a paisaxe e a xente do municipio. En Oroso, Sokram propón «Viaxe interior», unha reflexión sobre o camiño persoal. Agustina Shuan lembra en Mesía o papel histórico do hospital de Bruma como punto de confluencia. En Beche (Abegondo), Sekone pinta os peregrinos nocturnos. Finalmente, en Buscás (Ordes), María Martelo inspírase en fotografías antigas da veciñanza e de Gustav Henningsen para tender unha ponte entre pasado e presente.
