O Concello de Frades vén de finalizar as obras do proxecto "Pista de Fondevila a O Cabezo (Abellá) e outros", cun investimento de 163.889 euros para mellorar os accesos a seis localidades do municipio e acondicionar dúas pistas na parroquia de Abellá. Esta actuación está incluída no POS+ 2025.
As melloras abrangueron os accesos ás aldeas de A Taberna (Abellá), Meus (Añá), Sibío (Gafoi), Reboredo (Galegos), Barazón (Moar) e á área recreativa de Os Pasos, en Aiazo. O alcalde, Roberto Rey Martínez, destacou a aposta polo aglomerado para garantir "unha solución máis cara pero tamén a máis segura e duradeira para a nosa veciñanza".
Os traballos consistiron no bacheo das pistas, previo acondicionamento da súa capa de rodadura con tres centímetros de aglomerado. Tamén se realizou a apertura de cunetas, a limpeza de pasos de auga para garantir a correcta drenaxe, e a reposición da sinalización horizontal e vertical, incluíndo once sinais de stop. No caso do acceso a A Taberna, executáronse dúas cunetas revestidas con formigón.
Ademais, acondicionáronse dúas pistas na parroquia de Abellá cunha lonxitude total de 1.190 metros e máis de 4.000 metros cadrados de superficie. Nestes casos, realizouse un bacheo previo con grava e un tratamento asfáltico semiprofundo, mellorando posteriormente a capa de rodadura con tres centímetros de aglomerado.
