A publicación no Diario Oficial de Galicia (DOG) formaliza a convocatoria para os actos de levantamento das actas previas á ocupación dos terreos necesarios para a execución desta infraestrutura. As xuntanzas terán lugar o vindeiro 21 de setembro, de 10:00 a 12:00 horas, na nave agraria de Mesón do Vento, e ás 12:45 horas na sala de xuntas do concello de Carral. Posteriormente, o 17 de novembro, realizarase a formalización das actas de ocupación nas mesmas localizacións e horarios.
Este proxecto, impulsado pola Xunta, contempla a creación dun novo itinerario peonil de 1.780 metros de lonxitude. O obxectivo principal é mellorar a seguridade e a accesibilidade, conectando o Camiño Inglés coa estrada nacional N-550 á altura de Mesón do Vento. A senda dividirase en dous tramos: o primeiro, de 1.300 metros, discorrerá pola marxe dereita da AC-542, mentres que o segundo, de 380 metros, farase pola marxe esquerda ata a glorieta de conexión coa N-550.
A actuación busca dar continuidade a sendas xa existentes nos límites dos municipios de Ordes e Carral, aproveitando o paso do Camiño Inglés para potenciar o seu valor como ruta xacobea e mellorar a mobilidade peonil na zona. A inversión autonómica achegarase aos 1,2 millóns de euros.
