A concesión, que abarca terreos dos concellos de Frades, Mesía, Ordes e Oroso, terá unha duración de 30 anos sobre unha extensión de 66 cadros mineiros. Segundo o anuncio publicado no Diario Oficial de Galicia (DOG), prevese un investimento próximo aos seis millóns de euros para esta mina a ceo aberto.

Erimsa, con sede na Coruña e parte do grupo noruegués Elkem AS, deberá iniciar os traballos de explotación no prazo dun ano desde a notificación da resolución. A empresa xa obtivera en 2015 un permiso de investigación para avaliar a extracción de cuarzo. O proxecto foi reformulado, reducindo a superficie prevista inicialmente en 160 hectáreas e afastándoo do río Tambre.

As previsións desta explotación sitúan a produción anual en 384.841 toneladas de cuarzo metalúrxico. Durante o período de información pública, o proxecto recibiu 177 alegacións, das cales as de carácter ambiental foron tidas en conta nos informes e na declaración de impacto ambiental (DIA) emitida o pasado 30 de outubro.

A DIA concluíu que o proxecto é "ambientalmente viable" sempre que se cumpra o estudo de impacto ambiental e o programa de vixilancia ambiental establecidos.