A Consellería do Medio Rural activou a Situación 2 como medida de emerxencia ante a proximidade do lume a dous núcleos poboacionais: Sobrerribas e Cruxeiras de Abaixo. Esta última localidade tivo que ser evacuada na súa totalidade, segundo confirmou o alcalde padronés, Anxo Rei Arca, quen sinalou que os veciños aínda non puideran regresar preto das 20.00 horas.
O lume, declarado ás 16.01 horas do venres, avanza cara a Vilar do Bispo en Teo. Un dos flancos reactivouse ao longo da xornada, complicando a situación debido ás altas temperaturas e ao vento, que é máis intenso que o día anterior, segundo apreciou o rexedor.
Aínda que non se produciron danos persoais nin a vivendas, o risco é considerable en Cruxeiras de Abaixo, onde o persoal traballa intensamente para protexer as casas. O alcalde permanece xunto ao persoal de Medio Rural mentres se habilita o Posto de Mando Avanzado, mentres as brigadas tentan canalizar o avance do lume.
No operativo participan medios da Xunta, incluíndo técnicos, axentes, brigadas, motobombas, pas, unidades técnicas de apoio, helicópteros e avións. O Ministerio para a Transición Ecolóxica (Miteco) tamén colabora con dous avións anfibios e un helicóptero.
