A Xunta de Galicia destaca a rapidez de Augas de Galicia na execución de traballos de conservación fluvial nos ríos de Padrón, co obxectivo de previr o arrastre de cinzas tras o incendio forestal ocorrido en xuño.
A conselleira de Medio Ambiente e Cambio Climático, Ángeles Vázquez, explicou que estas actuacións, cun investimento superior aos 46.000 euros, foron deseñadas seguindo criterios técnicos e preventivos. O fin é reducir a erosión, protexer a calidade da auga e diminuír o risco de inundacións nas áreas afectadas polo lume.
Os traballos abranguen 1,5 quilómetros de canles nos regos de Herbón, Lamas e Xuane, ademais de dúas vías de concentración de fluxo. Inclúen a aplicación de acolchados con palla (mulching) en 0,46 hectáreas, a instalación de 1.223 metros de cordóns vexetais e a colocación de 73 metros de albarradas. Tamén se reconstruirán tramos de canle e se plantarán especies de ribeira para estabilizar as marxes e recuperar ambientalmente a zona.
A conselleira subliñou a importancia de realizar estes traballos antes das choivas. Lembrou que Augas de Galicia dispón de contratos plurianuais de conservación fluvial que permiten un traballo continuo e facilitan actuacións de urxencia cando son necesarias, como neste caso.
Esta programación é fundamental para a xestión integral dos ríos, xa que mellora a drenaxe e reduce puntos críticos de risco de avenidas, minimizando impactos en núcleos urbanos, infraestruturas e actividades económicas. A Xunta prevé incrementar o investimento neste ámbito nun 32,4%, pasando de 2,8 a 3,7 millóns de euros anuais.
