A adaptación da normativa, a promoción das experiencias e a súa comercialización son algúns dos desafíos que o pescaturismo afronta para o seu crecemento. Esta conclusión xurdiu do Congreso Internacional de Pesca & Turismo, que finalizou en Sanxenxo tras dúas xornadas de intercambio entre profesionais e entidades de dez países.
Na xornada de onte, o debate centrouse no papel dos Grupos de Acción Local do Sector Pesqueiro (GALP) no impulso do pescaturismo. Destacouse a formación de profesionais, a titorización de proxectos e o apoio ao financiamento. Identificouse tamén a necesidade de colaboración doutras administracións para adaptar a normativa e mellorar a promoción e comercialización.
A cooperación entre GALP perfílase como unha vía para avanzar mediante futuros proxectos conxuntos, sempre en colaboración co sector pesqueiro e atendendo ás súas demandas.
A xornada de hoxe presentou experiencias de pescaturismo e turismo mariñeiro, tanto as impulsadas por Mar e Rías: Pesca & Turismo como outras iniciativas xa en funcionamento en España e noutros países. Tras coñecer as propostas, os participantes votaron as iniciativas gañadoras nas tres categorías do congreso.
“"Na categoría de gobernanza, o proxecto gañador foi WEVA, presentado por Walter Foley, de Irlanda. No ámbito do pescaturismo, o recoñecemento recaeu en Pescaturismo Campelo Combarro, promovido por Yago Tomé, no territorio do GALP Ría de Pontevedra, mentres que na categoría de turismo mariñeiro foi distinguido Sente o Mar, presentado por Silvia Cobas, de Mugardos, no territorio do GALP Golfo Ártabro Norte."
O encontro reuniu participantes de España, Hungría, Portugal, Croacia, Grecia, Finlandia, Irlanda, Polonia, Estonia e Chipre. Abordáronse tamén a regulación destas actividades, as experiencias europeas, o papel das confrarías e organizacións profesionais e a cooperación entre territorios.
Como peche, os participantes desprazáronse a dúas experiencias sobre o terreo. En Sanxenxo, un grupo embarcou no Playa de Sanxenxo para unha ruta interpretativa pola ría con Sauro Martínez, impulsor de Mariñeiro por un Día, coñecendo a paisaxe costeira, aparellos, embarcacións e o patrimonio marítimo.
Outro grupo viaxou a Cambados para unha xornada coas mariscadoras de Guimatur, coñecendo técnicas tradicionais de marisqueo, ferramentas e patrimonio marítimo local, ademais de participar na actividade.
O congreso forma parte do proxecto de cooperación Mar e Rías: Pesca & Turismo, no que traballan conxuntamente os oito GALP de Galicia para impulsar o pescaturismo e o turismo mariñeiro. O proxecto desenvolve accións de formación, acompañamento a iniciativas emprendedoras e intercambio de coñecementos para favorecer novas oportunidades ligadas á actividade pesqueira.
