O sistema, composto por 111 paneis cunha potencia de 64,38 kWp, permitirá xerar electricidade renovable para cubrir aproximadamente o 20 % do consumo eléctrico anual da planta. A actuación foi adxudicada á empresa Instalaciones Eléctricas Coruñesas (INSTELEC) por 58.363,44 euros (IVE incluído) e enmárcase no proxecto Arteixo/SUMAGUA, financiado con fondos europeos NextGenerationEU.
Segundo as previsións, os paneis producirán uns 81.200 kWh de electricidade renovable ao ano, o que suporá un aforro económico estimado de entre 13.000 e 14.000 euros anuais e evitará a emisión de arredor de 33 toneladas de CO₂ cada ano. O sistema incorpora tecnoloxía de monitorización e autoconsumo sen vertedura de excedentes á rede.
Esta instalación fotovoltaica súmase a outras actuacións realizadas polo Concello para reforzar o abastecemento de auga no municipio. En 2024 rematou a construción dunha nova potabilizadora cun investimento aproximado de 1,5 millóns de euros e un novo depósito de 4.000 metros cúbicos, ao que se destinaron 409.000 euros.
A nova infraestrutura garante a calidade da auga e reforza a capacidade de abastecemento para atender as necesidades futuras de Arteixo e da súa contorna, como o Porto Exterior e o polígono industrial de Sabón. O novo depósito funcionará de maneira compatible co existente, de 20.000 metros cúbicos.
