O Consello de Administración da Sociedade de Vivenda Pública de Galicia (Vipugal) acordou hoxe a adxudicación do contrato para a construción de 25 vivendas de promoción pública na localidade de Noalla, pertencente ao concello de Sanxenxo.
A empresa Constructora San José será a encargada de executar o proxecto, cun importe de 6.307.684,92 euros. O prazo total de execución é de 19 meses, dos cales catro se dedicarán á redacción dos proxectos e os quince restantes á execución das obras.
As novas vivendas construiranse nunha parcela de 871 metros cadrados situada en Noalla, que foi cedida polo concello de Sanxenxo.
Esta licitación enmárcase no compromiso da Xunta de duplicar o parque de vivenda pública no período 2024-2028, co obxectivo de alcanzar as 8.000 vivendas. Ademais, a previsión do Pacto de Vivenda de Galicia 2026-2030 é chegar a 10.000 vivendas públicas no ano 2030.
