A iniciativa, que busca achegar longametraxes de calidade á cidadanía a un prezo asequible, presentouse hoxe coa presenza do edil de Cultura e Eventos, Xoán Manuel Pérez, e o produtor cinematográfico Daniel Froiz. Ambos destacaron a selección de filmes e a continuidade dos coloquios tras as proxeccións, unha proposta que xa tivo boa acollida na edición anterior.

A entrada para cada filme terá un custo de 3,75 euros e poderá adquirirse en liña a través de Ataquilla ou directamente o día da proxección no propio Auditorio. O ciclo consta de catro propostas cinematográficas.

A película inaugural, que se poderá ver o xoves 28 de maio ás 21.00 horas, é Así chegou a noite. Dirixida por Ángel Santos, este filme foi rodado e ambientado na zona de A Telleira, en Vilalonga. Narra a historia dun escultor que se illa progresivamente do seu contorno, ata que o encontro cunha antiga amante o leva a reflexionar sobre o seu desexo de soidade. Tras a proxección, haberá unha charla co director e actores do filme.

Continuando coa programación, o venres 29 de maio ás 21.00 horas proxectarase Tres adioses, de Isabel Coixet. A trama céntrase na separación dunha parella, onde a protagonista, Marta (interpretada por Alba Rohrwacher), comeza a experimentar cambios vitais tras perder o apetito e redescubrir o desexo.

A carteleira complétase o fin de semana con dúas propostas máis. O sábado 30 de maio, ás 21.00 horas, chega Valor sentimental, de Joaquim Trier. A historia xira arredor dunha recoñecida actriz de teatro, Nora, que se reencontra co seu pai, un director de cine, reabrindo feridas e lembranzas familiares.

Finalmente, o domingo 31 de maio ás 21.00 horas, proxectarase Las líneas discontinuas, de Anxo Fazáns. O filme presenta a Bea, unha muller de 50 anos en proceso de separación, que se atopa cun ladrón trans, Denís, na súa casa tras abandonar o fogar onde viviu dúas décadas.