A Consellería de Sanidade despregará un dispositivo sanitario especial con motivo da Festa do Albariño, un evento de gran afluencia en Cambados. O conselleiro de Sanidade, Antonio Gómez Caamaño, destacou que este operativo é un exemplo da planificación estival do Servizo Galego de Saúde para ofrecer seguridade e unha resposta sanitaria áxil.
O dispositivo, organizado en coordinación co Concello de Cambados, contará cun posto sanitario avanzado dotado dunha UVI móbil, un médico e outros profesionais sanitarios para dar resposta inmediata. O pasado ano, este posto realizou 665 asistencias durante os cinco días da festa, resolvendo a maioría no propio recinto.
Ademais, o PAC de Cambados terá un terceiro equipo de profesionais durante a fin de semana, e reforzaranse as Urxencias do Hospital do Salnés para responder ao incremento da demanda asistencial.
“"Quero facer un chamamento a que a xente goce da Festa do Albariño con prudencia e responsabilidade. Temos activadas todas as medidas necesarias para atender as necesidades sanitarias extraordinarias que poidan xurdir."
O conselleiro tamén puxo en valor o traballo dos profesionais sanitarios e lembrou as medidas extraordinarias adoptadas, como o reforzo dos medios do 061 e do Hospital do Salnés, ante o incremento da poboación e da actividade no verán.
Durante a visita, Gómez Caamaño coñeceu o funcionamento do centro de saúde de Cambados, que atende a máis de 15.700 usuarios. Destacou que o centro é un exemplo da capacidade asistencial da atención primaria, cun equipo multidisciplinar que ofrece atención integral. Só en xullo, rexistrou máis de 16.000 consultas.
Avanzou tamén que a Xunta presentará en setembro unha reforma integral da Atención Primaria, que buscará reducir a burocracia dos médicos, reorganizar axendas e incorporar novas categorías profesionais para unha atención máis completa.
