A industria pirotécnica galega, representada pola Asociación Galega de Industriais Pirotécnicos (Agip), manifestou a súa frontal oposición a unha "deriva prohibicionista" que, segundo denuncian, se está a estender por varios concellos da comunidade. A organización sinala que municipios como Vilagarcía de Arousa ou Padrón optaron nas últimas semanas por restrinxir ou vetar o uso de fogos artificiais, argumentando motivos ambientais, de prevención de incendios ou benestar animal.
Agip cualifica estas medidas de "restritivas e arbitrarias" e rexeita o que denomina "populismo ambiental", unha estratexia que, ao seu xuízo, emprega á pirotecnia como "chivo expiatorio" para proxectar unha imaxe de responsabilidade ecolóxica sen abordar os problemas reais do territorio. A asociación sostén que "o populismo, a covardía política e a demagoxia ambiental non poden servir de coartada para impedir o exercicio dunha actividade legal e que forma parte do acervo cultural da nosa comunidade".
“"O populismo, a covardía política e a demagoxia ambiental non poden servir de coartada para impedir o exercicio dunha actividade legal e que forma parte do acervo cultural da nosa comunidade."
Ante esta situación, Agip anunciou que emprenderá "accións legais" e esixirá "compensacións económicas subsidiarias por danos patrimoniais" contra aqueles concellos que cancelen unilateralmente contratos vixentes ou que inciten publicamente á non contratación de espectáculos pirotécnicos. A asociación considera que estas decisións responden máis a "criterios ideolóxicos" que a razóns técnicas ou xurídicas, atacando "un sector histórico e un piar da cultura galega".
En canto ao argumento do risco de incendios forestais, Agip desmente a súa relación coa pirotecnia. Segundo datos que achega, durante o ano 2025, considerado crítico para os montes galegos, realizáronse máis de 10.000 disparos pirotécnicos profesionais en Galicia, dos cales as estatísticas oficiais reflicten que provocaron o 0% dos incendios forestais rexistrados nese exercicio. Nese mesmo ano, Galicia sufriu a queima de 118.966 hectáreas, e as investigacións apuntaron a que entre o 70% e o 80% dos lumes tiveron orixe intencionado ou criminal.
“"A realidade do monte galego é teimuda fronte ao relato prohibicionista de determinadas administracións locais. O impacto da pirotecnia profesional e regulamentada foi dun 0,0 por cento absoluto."
Respecto ao impacto acústico, a asociación considera que existe unha "dobre vara de medir". Sinalan que os espectáculos pirotécnicos teñen unha duración escasa (10-15 minutos) e son previsibles, permitindo que persoas con hipersensibilidade ou donos de mascotas poidan planificar para evitalos. Con todo, critican que "eses mesmos concellos que prohiben os foguetes manteñen verbenas populares, concertos e atraccións de feira que emiten elevadísimos niveis de ruído durante cinco ou seis horas seguidas".
Agip reivindica o valor cultural e económico da pirotecnia en Galicia, considerando que criminalizala é "un acto de covardía política" e que "centos de familias galegas dependen directa ou indirectamente desta actividade". Defenden que os fogos artificiais forman parte "inseparable das celebracións populares dende hai xeracións" e conclúen mostrando a súa "contundente repulsa ás medidas promovidas" que atentan contra "unha actividade tradicional que forma parte da nosa máis arraigada cultura popular".
