A comarca de O Salnés deu un paso decisivo na modernización do seu modelo turístico coa presentación oficial do proxecto DTI O Salnés. Esta iniciativa, que conta cun investimento superior a 1,18 millóns de euros financiados polos fondos europeos Next Generation EU, dotará á comarca de ferramentas tecnolóxicas avanzadas para xestionar de forma eficiente e sostible a súa actividade turística. O obxectivo prioritario é unificar a información dispersa para comprender mellor o comportamento dos visitantes e optimizar recursos estratéxicos.
O novo despregamento tecnolóxico preséntase en tres grandes eixos. En primeiro lugar, a comarca estrea unha plataforma web desenvolvida pola tecnolóxica Neuromobile, que centralizará toda a oferta de experiencias, rutas, gastronomía e enoturismo. Ademais, interactuará coa Plataforma Intelixente de Destinos, garantindo unha conexión total de datos entre a mancomunidade e os distintos concellos.
A sustentabilidade hídrica constitúe o segundo piar. Para facer fronte á estacionalidade veraniega, implementouse o Módulo de Xestión Intelixente da Auga. Segundo explicou Iago Isasi Freire, responsable de Dixitalización de Espina & Delfín, o sistema utiliza sensores e monitorización en tempo real para medir consumos e caudais, permitindo anticipar situacións de estrés hídrico e reaccionar ante os picos de demanda.
Toda esta infraestrutura apóiase no denominado Data Lake Turístico, unha solución de almacenamento e análise centralizado de datos presentada por Víctor Sánchez Pradas, director de Servizos Dixitais en MasOrange. Esta ferramenta resolverá a falta de precisión sobre o impacto real do turismo, permitindo á Mancomunidade substituír a intuición por datos exactos sobre a procedencia dos viaxeiros, o gasto e o tempo medio de estancia.
A renovación do destino inclúe tamén unha vertente creativa co lanzamento da nova identidade de marca do proxecto. Elvira Furelos Ferreirós, CEO da axencia local Naranjalimón Branding 360, desvelou un imagotipo deseñado para transmitir os valores de conexión, coñecemento compartido e vangarda tecnolóxica.
O acto de presentación, conducido pola xornalista Carmen Chao, contou cunha apertura institucional a cargo de Carlos Vieitez, alcalde de Meaño; Sabela Fole, vicepresidenta da Mancomunidade de O Salnés; e Enrique Martínez, presidente de SEGITTUR. A xornada concluíu cunha mesa de diálogo sobre gobernanza e innovación na que tamén participaron Ramón Guinarte, director xerente da Mancomunidade, e Cesáreo Pardal, presidente do Clúster Turismo de Galicia. Con esta aposta pola economía do dato, O Salnés intégrase na rede nacional de Destinos Turísticos Intelixentes.
