A conselleira do Mar, Marta Villaverde, asinou hoxe en Ames dous convenios de colaboración coa Federación Galega de Confrarías de Pescadores, dotados con 152.000 euros. A maior parte destes fondos, 125.000 euros, apoiarán o funcionamento diario da entidade, mentres que os 27.000 euros restantes impulsarán investimentos para mellorar a competitividade, a formación e a promoción das confrarías.
As actuacións previstas inclúen melloras na sede, como climatización e eficiencia enerxética, novos equipamentos para a conectividade, a actualización da páxina web e formación en intelixencia artificial aplicada. Esta achega súmase ao apoio continuado da Consellería, cun investimento acumulado de preto dun millón de euros entre 2020 e 2026.
Ademais, asináronse outros dous convenios coa Federación Provincial de Confrarías de Pescadores da Coruña, por un importe de 141.000 euros. Estes fondos apoiarán a actividade da federación coruñesa ao longo de 2026, incluíndo o apoio ao funcionamento diario, a adquisición de novo equipamento administrativo e informático, material técnico para o seguimento ambiental e apoio científico-técnico, así como actividades de formación.
A Consellería do Mar xa apoiou á entidade representativa do sector pesqueiro coruñés cun investimento acumulado de 872.000 euros no período 2020-2026.
