Un home faleceu na parroquia de Tremoedo, no municipio de Vilanova de Arousa, despois de ser atropelado por un turismo na estrada PO-530. O suceso tivo lugar sobre as 02,00 horas deste sábado.
Segundo informou o servizo de emerxencias 112 Galicia, foi un particular quen alertou do ocorrido, indicando ademais que o vehículo implicado non se detivo tras o impacto.
A vítima quedou tendida no medio da vía e, a pesar dos intentos dos profesionais sanitarios desprazados ao lugar, non foi posible salvarlle a vida.
Ao punto desprazáronse efectivos de Urxencias Sanitarias de Galicia-061 e axentes da Garda Civil de Tráfico para atender a emerxencia e iniciar as investigacións pertinentes.
