O programa provincial +Música da Deputación de Pontevedra chega este xoves 30 de xullo a Cambados co concerto de Mondra. A actuación terá lugar na praza de Fefiñáns ás 23:00 horas.
Este programa provincial, dotado con 700.000 euros, colabora cos concellos de menos de 50.000 habitantes da provincia na súa programación cultural, co obxectivo de difundir e fomentar a lingua e a cultura galegas.
Mondra presentará o seu segundo traballo discográfico, “De ronda”, producido por Hevi. O espectáculo mestura música en vivo, danza e unha posta en escena visual, baixo a dirección artística de Daniel Rodríguez. No escenario, Mondra está acompañado por Artur Puga, Julia Sánchez-Biezma, Xabi Gómez e Saínza Piñeiro na banda, e Sabela Domínguez e Jandros Rodríguez na danza.
O concerto forma parte das 93 actuacións programadas entre maio e decembro en 58 concellos da provincia. A Deputación achega o orzamento para os custos de caché dos espectáculos, impulsando así a reputación de Pontevedra como destino cultural e apostando pola descentralización da cultura.
