A Deputación de Pontevedra abriu o prazo de inscrición para a primeira proba do novo circuíto provincial Entre Pontes Trail & Running. Esta nova experiencia deportiva deseñada pola institución provincial comezará o domingo 20 de setembro coa carreira 10k que terá lugar entre A Illa de Arousa e Vilanova de Arousa. A proba partirá desde a ponte do concello insular ata o porto vilanovés.
O deputado provincial Javier Tourís, acompañado da directora de Deportes, Xisela Aranda, presentou a xornada na estación marítima de Vilanova de Arousa. As inscricións xa se poden realizar a través do sitio web institucional.
O circuíto Entre Pontes Trail & Running constará de seis xornadas, con tres carreiras 10k e tres trails de 14 quilómetros. Todas elas irán acompañadas dunha andaina popular e dunha proba para a rapazada, co obxectivo de que sexa unha actividade familiar. Ao remate das actividades, haberá unha zona de food trucks.
O número máximo de participantes por xornada será de 500 persoas para as carreiras principais, mentres que outras 150 poderán participar na andaina e na carreira infantil, sumando un total de 800 participantes por evento.
As probas continuarán entre outubro e novembro en concellos como Vigo, Gondomar, Cerdedo Cotobade, Pontevedra e Moaña. O obxectivo principal é descentralizar as actividades, fortalecer a economía local, promover a provincia como destino de deporte ao aire libre, fomentar a sustentabilidade e a conexión coa natureza.
A Deputación busca converter a provincia de Pontevedra na provincia do deporte, apoiando deportistas, colaborando con entidades, mellorando instalacións e impulsando grandes eventos deportivos.
As probas son de balde. O calendario inclúe un trail en Vigo o 12 de outubro, unha 10k en Gondomar o 25 de outubro, un trail en Cerdedo Cotobade o 1 de novembro, unha 10k en Pontevedra o 22 de novembro, e rematará cunha proba de trail en Moaña o 29 de novembro.
