Os datos oficiais de poboación publicados polo Instituto Nacional de Estadística (INE) a data de 1 de xaneiro de 2026 confirman unha evolución positiva para o municipio de Cambados. A vila alcanza actualmente os 13.795 habitantes, consolidando así unha tendencia de crecemento sostido que reforza o municipio.

Dende o goberno municipal valoran moi positivamente estas cifras, que ratifican un cambio de rumbo iniciado no ano 2022. Tras varios exercicios consecutivos de perda de veciños, o concello conseguiu inverter esa dinámica negativa e comezou unha etapa de clara recuperación demográfica.

A serie histórica recente mostra unha evolución claramente favorable ao longo do último lustro: o municipio contaba con 13.671 habitantes en 2022, pasando a 13.681 en 2023, 13.752 en 2024 e 13.787 en 2025, ata alcanzar o teito actual neste arranque de ano.

Esta progresión evidencia que Cambados continúa sendo un concello atractivo para vivir, traballar e desenvolver un proxecto de vida. O executivo local vincula este éxito ao dinamismo económico, á calidade de vida e ás políticas impulsadas para fortalecer os servizos públicos.

Dende o executivo sinalan que estes datos son unha boa noticia que reflicte o traballo realizado para mellorar o municipio nun contexto demográfico complexo. De cara ao futuro, o goberno local comprométese a seguir creando oportunidades para consolidar esta tendencia con novas familias e mozos.