A Casa da Artesanía de Galicia, situada en Ribadavia, acolle esta fin de semana un obradoiro de xoiería centrado na técnica do bordado ao aire. A formación está impartida por Zeltia Rodríguez, de Zeltia ao Aire (A Coruña), e forma parte da programación de divulgación e promoción da Artesanía de Galicia nesta vila ourensá.
Oito persoas participan nesta iniciativa, onde se inician nas nocións básicas do bordado ao aire para a elaboración de pezas de xoiería inspiradas en padróns tradicionais. Durante o curso, os asistentes aprenden técnicas como rematar, moverse polo fío e realizar diferentes tipos de recheo, culminando coa creación dunha pulseira e uns pendentes.
O obradoiro desenvólvese hoxe sábado en horario de mañá e tarde, e continuará mañá domingo pola mañá. Esta actividade enmárcase no proxecto Vilas Vivas, unha iniciativa pioneira da Xunta en colaboración co Concello de Ribadavia, que busca transformar espazos en desuso en negocios rendibles e xerar emprego.
A Casa da Artesanía de Galicia, un dos locais acondicionados dentro deste proxecto, funciona como espazo permanente de comercialización, promoción e divulgación de oficios artesanais galegos. Desde o Nadal pasado, acolle obradoiros e cursos formativos co obxectivo de dinamizar a vila.
Na planta baixa deste edificio, unha tenda ofrece venda directa de produtos da marca Artesanía de Galicia, incluíndo pezas de cerámica, xoiería, bixutería, xoguetes, téxtiles, coiro, complementos de moda e figuras tradicionais. O horario da tenda é de xoves a sábado de 11:00 a 14:00 e de 17:00 a 21:00 horas, e os domingos de 11:00 a 15:00 horas.
