A conselleira do Medio Rural, María José Gómez, asistiu hoxe á XXXV edición da Festa da Vendima de Leiro, onde destacou a Denominación de Orixe (DO) Ribeiro como un modelo a seguir no sector vitivinícola galego. Subliñou que este evento é un espazo para celebrar a excelente calidade dos viños elaborados en Galicia e recoñecer o traballo das persoas viticultoras.
Acompañada polos directores xerais da PAC e do Control da Cadea Alimentaria, Juan José Cerviño; de Comercio e Consumo, Gabriel Alén; e polo delegado territorial da Xunta en Ourense, Manuel Pardo, a conselleira lembrou que a DO Ribeiro é a máis antiga de Galicia, recoñecida polo Estatuto do Viño en 1932.
Actualmente, a DO Ribeiro conta cunha superficie inscrita de 1.215 hectáreas e aglutina a unhas 1.300 persoas viticultoras. No ano 2025, produciron aproximadamente 7,6 millóns de litros de viño cun valor económico estimado de 30,7 millóns de euros. Para 2026, espérase unha vendima abundante e de calidade, cunha produción que podería roldar os 10 millóns de quilos.
Gómez tamén fixo fincapé no valor do sector vitivinícola galego, representado polos seus selos de calidade. Galicia posúe dez distintivos (cinco DO e cinco IXP) que suman máis do 50 % do valor económico da calidade diferenciada galega, superando os 379 millóns de euros.
A conselleira reafirmou o compromiso do Goberno autonómico con este sector, ao que destina anualmente uns 12 millóns de euros a través de diversas liñas de axuda. Estas inclúen convocatorias para a reestruturación e reconversión de viñedo, a promoción do viño galego en mercados internacionais, investimentos en elaboración e comercialización, e apoio á conservación paisaxística e á loita contra a erosión en viñedos da Ribeira Sacra.
Ademais, engadiu que existen outras iniciativas específicas para apoiar aos consellos reguladores, cuxo labor é fundamental para preservar e potenciar a cultura vitivinícola.
