O evento, que conta co selo Xacobeo, terá lugar en Laias, no municipio de Cenlle, e ofrecerá dúas xornadas dedicadas aos viños da Denominación de Orixe Ribeiro, á gastronomía local, á música, á artesanía e aos produtos de proximidade. Esta iniciativa forma parte dos Concertos do Xacobeo promovidos por Turismo de Galicia.
O festival mantén o seu carácter itinerante, alternando a súa organización entre os concellos de Castrelo de Miño, Cenlle e A Arnoia. Tras celebrarse en Castrelo de Miño o ano pasado, Cenlle acollerá a edición de 2026 e A Arnoia a de 2027. Esta fórmula busca optimizar recursos e levar o evento a diferentes puntos da comarca.
Na presentación oficial, celebrada na delegación territorial da Xunta en Ourense, participaron diversas autoridades e representantes do sector. O conselleiro de Emprego, Comercio e Emigración, José González, destacou o festival como un "exemplo de cooperación territorial e de posta en valor dos recursos propios", resaltando a súa capacidade para atraer visitantes e dinamizar a economía local.
A alcaldesa de Cenlle, Rebeca Sotelo, expresou o entusiasmo do concello por acoller o evento, sinalando que "cada ano temos máis xente" e que a alternancia entre municipios permite "optimizar recursos e poder traer mellor cartel".
“"Para os nosos concellos é unha maneira de darlle publicidade aos viños dos nosos colleiteiros e adegueiros."
A programación do sábado 22 de agosto comezará co espectáculo de maxia de Pablo Estévez. Pola noite, actuarán Cómplices (21:00h) e Montoya y Carmona (23:00h). O domingo 23, haberá unha homenaxe a Buena Vista Social Club (19:30h) e o concerto de Queiman Folk Rock (21:30h). Ademais, desde as 17:00h, o Xacobeo Splash ofrecerá inchables de auga para os máis pequenos.
Complementaranse as actividades con dous obradoiros gratuítos da Fundación Artesanía de Galicia sobre cianotipia e serigrafía téxtil.
