A iniciativa, orientada a mellorar as oportunidades laborais, combinou formación especializada, orientación e prácticas en empresas. Ao longo do programa atendéronse 110 persoas, das cales o 50 % foron mulleres, o 35 % menores de 30 anos, o 5 % persoas con discapacidade e o 10 % desempregadas de longa duración.
Impartíronse especialidades como caixa e reposición, primeiros auxilios, atención a persoas dependentes, orientación sociolaboral e xestión contable, xunto con formación complementaria en ámbitos como a prevención de riscos laborais, a informática, a busca de emprego, o inglés, a loxística ou a intelixencia artificial.
Xestionáronse prácticas laborais non profesionais para 27 participantes. A porcentaxe de inserción laboral situouse arredor do 35-40 %, un resultado que, segundo o delegado, Pablo Fernández, "pon de relevo a importancia de achegar a formación ás necesidades do mercado de traballo".
Fernández destacou a aposta da Xunta pola creación de emprego de calidade e pola formación como ferramenta para mellorar a empregabilidade e abrir novas oportunidades profesionais.
