A Escola Naval Militar de Marín abriu as súas portas este luns para dar a benvida aos novos aspirantes a oficiais da Armada. Tras unha emotiva despedida dos seus familiares, os alumnos cruzaron a emblemática porta Carlos I para dar comezo ao seu período de adaptación á estrita vida militar.
Nos arredores da Escola Naval, o ambiente estaba cargado de emoción. Os aplausos non cesaron cada vez que se nomeaba a un dos aspirantes, reflectindo a ilusión e o orgullo dos presentes.
Unha vez superado o control de acceso, os alumnos organizáronse en formación de tres e dirixíronse cara ao cuartel que será a súa residencia durante o curso. A comitiva avanzou ao ritmo da banda de música da academia naval, escoltada polos brigadieres e gardiamarinas que xa inician o seu cuarto ano na institución.
