Durante o mes de xullo, a Policía Local de Sanxenxo tramitou un total de 382 denuncias administrativas por miccionar na vía pública. Esta infracción, considerada grave pola Ordenanza de Convivencia Cidadá, foi detectada principalmente nas horas nocturnas e pode supoñer multas de ata 400 euros.
No conxunto do mes, as forzas policiais rexistraron 548 denuncias administrativas xerais, ás que se sumaron 1.694 sancións relacionadas co tráfico. Fóra das relativas a ouriñar na rúa, outras infraccións administrativas incluíron 64 denuncias por botellón, 29 por ruídos, 15 por incumprimento de horarios en establecementos hostaleiros e unha por exceso de aforo.
Estas actuacións policiais tiveron lugar nun contexto de alta afluencia turística e aumento da poboación no municipio pontevedrés durante a tempada estival. A central de chamadas da comisaría de Miraflores recibiu 2.540 chamadas en xullo para solicitar axuda, presentar denuncias ou obter información.
Ademais, a Policía Local de Sanxenxo recolleu 364 obxectos perdidos durante xullo, dos cales 145 xa foron devoltos aos seus lexítimos propietarios. Entre os artigos recuperados destacan aneis, documentación, teléfonos móbiles, chaves, tarxetas bancarias e diñeiro en efectivo. Os obxectos custodiados pola policía durante un máximo de 24 meses, tras os cales, se non son reclamados, son destruídos, reciclados ou doados.
