Ata o vindeiro 18 de maio, os consumidores que realicen compras nos establecementos asociados poderán rexistrar os seus tiques na web oficial Comercio de Marín. Como incentivo, sortearase unha tarxeta regalo de 50 euros, que deberá ser utilizada nos mesmos negocios participantes, garantindo así que o beneficio económico se manteña na economía circular da localidade.

Esta fase da campaña é a continuación dunha innovadora experiencia de gamificación comercial que tivo lugar a semana pasada. Nela colaborou activamente o alumnado do Ciclo Medio de Actividades Comerciais do IES Chan do Monte de Marín, xunto cun grupo de estudantes italianos do Instituto Tecnico Statale Aterno-Manthoné de Pescara, que participaron a través do programa Erasmus.

En total, 20 alumnos e cinco docentes participaron nunha xornada de aprendizaxe práctica en contornas reais, onde analizaron técnicas de venda e atención ao cliente nos escaparates da vila. A directiva do CCA Estrela de Marín subliña que o obxectivo de Comercio e Letras vai máis alá da simple promoción de vendas, buscando proxectar o comercio de proximidade como un espazo vivo de relación humana e profesional, especialmente entre o público máis novo.