Estas pezas, realizadas en formigón, pretenden converterse nun novo punto de interese para visitantes e veciños, fomentando a promoción da vila e inmortalizando a súa estancia. A alcaldesa, María Ramallo, destacou que "están chamadas a converterse nun punto de referencia para todas as persoas que nos visiten, pero tamén para os propios marinenses. Queremos que a xente presuma de Marín, que se faga fotografías aquí, que ensine os cambios tan importantes que estamos vivindo e que comparta o Marín que se está transformando".

A rexedora tamén puxo en valor a localización escollida, xunto ao novo auditorio e a Praza de España, "un dos entornos máis emblemáticos do noso centro urbano". Dende o Concello anímase á cidadanía a compartir as súas fotografías e vídeos nas redes sociais etiquetando á entidade local para contribuír á difusión deste novo símbolo.

Paralelamente, continúan a bo ritmo as obras de axardinamento arredor do auditorio, financiadas con fondos europeos. Os traballos inspirados en xardíns ingleses buscan crear un conxunto paisaxístico atractivo e colorido. Esta actuación forma parte do Plan de Sostibilidade Turística, que tamén inclúe a mellora da contorna da dársena portuaria do antigo Cementerio de Chalanas.

Os traballos están xa nunha fase moi avanzada, con especial atención á construción de bancos. Próximamente instalarase unha placa de aceiro, en colaboración co Museo do Mar de Marín, como homenaxe aos homes e mulleres do mar. Tamén se prevé a posta en marcha dos xogos de auga do Paseo Alcalde Blanco.

Ademais, a alcaldesa avanzou parte da programación cultural do auditorio, destacando un concerto de música militar o mércores 10 de xuño con motivo do 60 aniversario da Brilat. Participarán a Unidade de Música da Escola Naval Militar, a Banda de Guerra da Brilat e a Banda de Música Airiños de San Xulián.