A Concellaría de Deportes de Allariz xa dispón da oferta de actividades deportivas para a vindeira tempada 2026/2027. O prazo de inscrición permanecerá aberto durante todo o mes de setembro, ofrecendo opcións tanto para persoas adultas como para a cativada.
As nenas e nenos poderán escoller entre unha ampla variedade de disciplinas, incluíndo fútbol, baloncesto, piragüismo, natación, equitación e kung-fu. Para os máis pequenos, a partir de outubro organizaranse as escolas predeportivas, cuxas inscricións se informarán proximamente.
As familias interesadas nas escolas deportivas municipais de fútbol e baloncesto deberán contactar directamente cos clubs correspondentes. Para o fútbol, a inscrición realízase no CD Allariz (no Seixo), mentres que para o baloncesto será no Pavillón Municipal a través do CB Allariz. O Club Fluvial Allariz xestionará o piragüismo e a Hípica de Allariz, a equitación.
No Complexo Deportivo de Vilanova, as persoas abonadas terán acceso a cursos de natación (iniciación e perfeccionamento), aquagym, ioga, pilates, zumba e adestramento funcional.
Para máis información ou para formalizar as inscricións, pódese contactar coa Piscina Municipal no teléfono 988 442 083 ou a través do correo electrónico piscina@allariz.gal.
