O entorno da dársena portuaria de Marín está a completar a súa transformación, deixando atrás o seu uso exclusivo como zona de estacionamento para converterse nunha área de goce cidadán. Os traballos, que xa inclúen a instalación de zonas verdes, bancos e novo mobiliario urbano, buscan conectar a Praza de España co Paseo Alcalde Blanco.
Un dos elementos máis salientables desta intervención é o deseño dunha placa de aceiro corten, realizada en colaboración coa Asociación Museo do Mar de Marín, que servirá como homenaxe aos homes e mulleres do mar. Ademais, o proxecto contempla a instalación de letras corpóreas co nome do municipio, que funcionarán como un novo reclamo visual para visitantes e veciños.
A actuación tamén permitiu sanear a lámina de auga, que anteriormente presentaba un estado de abandono con acumulación de restos de obra e fondeos antigos.
“"Este ambicioso proxecto de recuperación urbana supón '0 euros de gasto para o Concello'."
Este proxecto está integramente financiado a través do Plan de Sostibilidade Turística en Destino (PSTD), tras lograr unha ampliación de fondos de 300.000 euros. De forma paralela e vinculada ao mesmo plan de sostibilidade, o municipio instalou catro tótems de información cultural e turística en puntos estratéxicos: o entorno do Auditorio, o Parque Eguren, a Finca de Briz e o Mercado de Seixo. Estas pantallas, con conexión directa a datos e electricidade, forman parte da nova Oficina Virtual de Turismo e ofrecerán recursos e información de interese de maneira interactiva para potenciar a experiencia dos turistas que visitan a vila.
