A Xunta de Galicia anunciou hoxe os nomes que pechan a oferta de concertos gratuítos de verán na Cidade da Cultura. Os artistas Israel B, Santa Salut e Silee actuarán o vindeiro xoves 13 de agosto na Praza central do Gaiás, dentro da xornada dedicada aos ritmos urbanos que pecha o ciclo Atardecer no Gaiás.
Israel B, con presenza na escena do rap española desde 2008, acadou o disco de platino en 2021 co tema Tranquilísimo, unha colaboración con C. Tangana. O artista madrileño conta cunha base de fans que supera os 835.000 oíntes mensuais en plataformas dixitais.
Desde Sabadell chega Santa Salut, unha das voces femininas máis destacadas do rap actual en España. Influenciada polo hip hop clásico, a artista catalá aborda temas sociais e feministas nas súas composicións, presentando recentemente o seu terceiro traballo, Queens of groove.
Completa o cartel Silee, un dos novos valores da música urbana galega procedente de Bueu. O artista, que tamén se encarga da produción dos seus temas e videoclips, acadou un éxito viral co seu recente sinxelo Milajros de Amil, que superou os catrocentos mil reproducións en dous meses.
Con estas tres incorporacións, o ciclo Atardecer no Gaiás suma un total de 14 artistas e bandas que actuarán na Cidade da Cultura ata o 14 de agosto. A iniciativa, que conta co apoio de Cervezas Alhambra, forma parte da campaña de verán Para gustos, cultura da Consellería de Cultura, Lingua e Xuventude.
A programación destaca pola diversidade de estilos e a presenza destacada da escena galega, con artistas de punk, rock, electrónica, novo tradi, pop e música urbana, reflectindo a pluralidade do talento musical na comunidade.
