A paisaxe toponímica de Galicia experimentou unha significativa renovación coa entrada en vigor da actualización do Nomenclátor. Este proceso, que contou coa supervisión da Real Academia Galega, implicou a modificación de máis de 4.000 topónimos e o cambio oficial de denominación en doce concellos, co obxectivo de recuperar a súa forma tradicional e máis precisa.
Entre os municipios afectados por esta "pequena revolución toponímica" atópanse A Caniza, A Ribeira de Piquín, Alfoz do Castrodouro, Cangas de Morrazo, Cerdedo Cotobade, Mondariz Balneario, O Campo Lameiro, O Castro de Caldelas, O Porto do Son, O Riós, Oza Cesuras e Pastoriza. Os cambios varían desde a inclusión ou eliminación de artigos e guións ata a recuperación de nomes con séculos de historia.
A revisión non é meramente estética, senón que responde a un rigoroso traballo de fondo baseado en documentación histórica, o uso oral da veciñanza, estudos filolóxicos e a tradición escrita. A Xunta de Galicia recoñece que a toponimia galega sufriu un "proceso de deturpación" ao longo do tempo, e esta actualización busca corrixir esas distorsións.
Os criterios xerais que os especialistas da RAG seguen para ditaminar e, polo tanto, modificar ou manter a forma oficial dun topónimo son catro: malia que o primordial é a etimoloxía de cada unha das denominacións, téñense en conta tamén as atestacións escritas na documentación histórica, especialmente cando a etimoloxía é escura; a tradición gráfica consolidada nos últimos dous séculos, e mais o uso oral e escrito que a veciñanza e as principais institucións fan do topónimo.
Ademais das correccións, o Nomenclátor amplíase con 2.531 topónimos modificados e 1.655 novos nomes incorporados, sumando un total de 42.909 rexistros. Este traballo é considerado un proceso aberto e inacabado, xa que aínda quedan lugares nas provincias de Ourense e Pontevedra pendentes de estudo, e prevese unha revisión exhaustiva dos topónimos referidos aos barrios urbanos en futuras edicións.
