A Cámara galega aprobou unha proposición non de lei, impulsada polo Grupo Popular, para que a Xunta de Galicia implemente un servizo de simulación de entrevistas de traballo baseado en avatares de intelixencia artificial (IA). A iniciativa foi votada na Comisión 5ª, Sanidade, Política Social e Emprego, e saíu adiante unicamente cos votos a favor do PPdeG. O BNG votou en contra, mentres que o PSdeG e Democracia Ourensana abstivéronse.
O obxectivo deste simulador, que se integrará no circuíto de orientación e se complementará coa titorización de persoal especializado, é "fortalecer as habilidades de presentación, comunicación e argumentación das persoas candidatas e mellorar a súa empregabilidade efectiva", segundo recolle o texto aprobado.
Ademais, o Parlamento acordou solicitar á Xunta que impulse as actuacións necesarias para acometer a reforma do centro de saúde de Cangas. Paralelamente, instará o Concello a pór a disposición os terreos necesarios para a construción do novo centro integral de O Morrazo.
Esta segunda proposición tamén foi aprobada na Comisión 5ª cos nove votos a favor do PPdeG e a abstención do resto de grupos. A iniciativa busca que o Goberno galego reforme o ambulatorio de Cangas para "adaptar os seus espazos ás novas necesidades da atención primaria en tanto non se constrúa o centro integral de saúde".
