O circuíto +Escénicas, unha iniciativa da institución provincial para apoiar a programación cultural nos concellos de menos de 20.000 habitantes, chega a Bueu coa nova proposta da compañía Teatro ó Cubo. O espectáculo, titulado Ghop!, está deseñado para un público familiar e terá lugar na Praza Massó ás 20:30 horas.
Ghop! defínese como un espectáculo de rúa áxil, participativo e cheo de humor, inspirado na estética dos circos ambulantes tradicionais. Tres protagonistas, caracterizados para a ocasión, combinan malabares, monicreques, acrobacias e maxia nun show de variedades pensado para a diversión e a participación do público.
O circuíto +Escénicas responde a unha demanda histórica do sector profesional e, tras o éxito das súas edicións anteriores, a Deputación incrementou o seu orzamento nun 36%, alcanzando os 204.000 euros para este ano. Cada concello pode solicitar ata cinco actuacións do catálogo de máis de 600 propostas dispoñibles, cun réxime de cofinanciamento que varía segundo o tamaño do municipio.
