As investigacións comezaron en novembro de 2024, tras un roubo con forza nunha empresa de caldeirería en Pontecesures. Os ladróns levaron material, ordenadores e ferramentas valorados en 10.000 euros. Tras unha inspección técnico-ocular e outras pescudas, os axentes identificaron aos presuntos autores.

Os sospeitosos, tres homes de entre 37 e 46 anos, residentes en Santiago de Compostela e Ames, utilizaban unha furgoneta de aluguer para os seus desprazamentos. Foron detidos cando se localizou parte do botín nun establecemento de obxectos de segunda man.

Apenas vinte días despois do primeiro incidente, os tres individuos fuxiron dunha patrulla da Garda Civil mentres circulaban coa mesma furgoneta. Tras unha persecución que rematou en Caldas de Reis, abandonaron o vehículo e continuaron a fuga a pé. No interior da furgoneta atopáronse 750 quilos de perfís de aluminio, subtraídos dunha empresa de extrusionado de Padrón, valorados en 2.000 euros, que foron restituídos ao seu propietario.

No mes de decembro de 2024, a prensa local informou de que outra empresa de extrusionado de aluminio en Padrón sufrira nove roubos. A Garda Civil vinculou aos detidos con sete destes delitos, recuperando 250 quilos de barras de aluminio, valoradas en 600 euros, nunha planta de reciclaxe de metais en Vilagarcía de Arousa.

A análise dos rexistros da planta de reciclaxe revelou que os implicados venderan un total de 14.212 quilos de material metálico (principalmente cobre e aluminio) durante o ano 2024, obtendo un beneficio económico de 25.365 euros. Unha cuarta empresa, dedicada á carpintaría metálica en Bueu, tamén foi vítima, sufrindo a subtracción de aproximadamente 500 quilos de material inoxidable valorados en 600 euros.