A xornalista Carolina Neira, presentadora do evento, deu as pistas sobre a sorpresa final que pecharía a estrea do auditorio, destacando a figura de Núñez como un dos músicos máis internacionais de Galicia e un musicólogo excepcional.
O músico irrompeu no patio de butacas coa súa tradicional frauta de pico, interpretando o tema local Eu de Marín ausenteime, que rematou no escenario coa participación de todos os asistentes. Núñez eloxiou a acústica do novo espazo, afirmando que "A proba do algodón deste Auditorio esta superada. Ata se escoita ben sen micro".
O gaiteiro tamén recoñeceu que o centro inaugurado era "un gran Auditorio" e asegurou que "moita xente será moi feliz aquí". A continuación, interpretou Danza de Espadas, un tema lanzado en 2022 en honra á propia Danza de Espadas de Marín, cuxo videoclip se gravou na localidade.
Un dos momentos máis emotivos e divertidos da xornada chegou coa interpretación de Alborada de Veiga/ Muiñeira de Chantada. Núñez invitou a todos os presentes a bailar, incluído o presidente da Xunta, Alfonso Rueda, quen, xunto á alcaldesa de Marín, María Ramallo, e o tenente de alcalde, Manuel Santos, acabaron no escenario xunto a outros representantes locais e autonómicos.
A actuación de Carlos Núñez marcou a primeira gran cita musical do novo Auditorio de Marín, que en setembro se integrará na Rede Galega de Auditorios.
