O municipio de Bueu quenta motores para a celebración da Festa das Alfombras Florais do Corpus, un evento que terá lugar os días 6 e 7 de xuño. O alcalde, Félix Juncal, destacou en COPE Pontevedra a importancia desta cita, declarada Festa de Interese Turístico Galego desde 2017, que representa un dos momentos de maior orgullo colectivo pola implicación da veciñanza na ornamentación das rúas do casco urbano.
O rexedor lembrou que esta tradición supera o século de historia, cun auxe especial nas décadas dos 40 e 50 coas carrozas elaboradas na carpintaría de Massó, unha imaxe que desapareceu tras o peche da conserveira nos anos 70.
Ante a evolución social da festa, marcada polo paso das vivendas tradicionais a edificios de pisos, o Concello e colectivos como a Asociación Cunchas e Flores traballan para reactivar o compromiso veciñal. Neste sentido, o alcalde puxo o acento na colaboración cos centros educativos e na implicación da infancia, que será protagonista coa alfombra infantil prevista para o domingo ás 9:00 horas na rúa Eduardo Vincenti, co obxectivo de garantir o relevo xeracional. O Concello facilitará materiais como cebada, cuncha, cortiza e tintes ás persoas participantes.
A celebración tamén pon sobre a mesa o seu impacto turístico. Juncal defendeu a necesidade de implantar unha taxa turística, argumentando que o aumento de visitantes xera presión sobre servizos municipais como a auga ou a recollida de lixo, que o Concello asume sen financiamento adicional. O alcalde lembrou tamén que a parroquia de Cela celebra o seu propio Corpus con alfombras e verbenas, o que evidencia a vitalidade desta tradición en todo o municipio.
No plano organizativo, o programa inclúe o corte de tráfico o sábado ás 18:00 horas para facilitar a elaboración das alfombras. O domingo celebraranse a misa cantada na igrexa de San Martiño e a procesión da tarde, acompañada pola Banda de Música Artística de Bueu. Como novidade, a verbena final coa orquestra Marbella trasladarase ao exterior do Centro Social do Mar debido ás obras no Parque Urbano Lugrís.
