O Concello de Marín cualifica de "moi positivo" o balance da recente edición da Festa Corsaria, celebrada o pasado venres e sábado. Este evento converteuse na máis multitudinaria dende a súa creación, superando todas as expectativas de asistencia e participación.
Tras quince anos de celebración ininterrompida, o éxito desta edición impulsa ao Goberno local a dar un novo paso para consolidar a festa como un referente no calendario festivo e turístico de Marín. Por iso, iniciarase o procedemento para solicitar á Xunta de Galicia a declaración de Festa de Interese Turístico de Galicia, co obxectivo de obter este recoñecemento nas próximas edicións.
Fontes do Concello sinalan que "esta Festa Corsaria xa transcende o ámbito local" e que a edición demostrou ser "unha celebración plenamente consolidada, capaz de atraer a milleiros de persoas de Marín, da contorna e tamén doutros puntos de Galicia". Engaden que "chegou o momento de dar este paso" para que a Xunta valore a súa declaración.
A dimensión acadada pola celebración evidénciase no elevado número de solicitudes para instalar mesas nas rúas, superando o cento. Particulares e establecementos hostaleiros presentaron peticións para organizar xantares e ceas, contribuíndo á imaxe de Marín como un gran espazo de convivencia.
A afluencia de público foi alta durante todas as actividades, con visitantes procedentes non só de Marín e a súa contorna, senón tamén doutras localidades galegas.
O Concello tamén destaca a boa acollida da programación cultural engadida nesta edición, impulsada pola Xunta de Galicia a través dos concertos do Xacobeo e o programa Orballo Cultural. Os concertos de Mondra e Ortiga serviron como preámbulo musical á xornada principal.
A combinación de actividades culturais, gastronómicas, animación, o Mercado Corsario e a música mantivo un ambiente festivo constante, dinamizando o municipio e atraendo visitantes.
A festa desenvolveuse con normalidade e sen incidentes reseñables, a pesar da gran afluencia de público. O Concello agradeceu o traballo da Policía Local e os corpos de seguridade.
Co peche desta edición, o Concello considera que a Festa Corsaria está nun momento de madurez para formular novos obxectivos. A solicitude de declaración como Festa de Interese Turístico busca recoñecer a súa evolución e reforzar a súa proxección máis aló de Marín.
Esta declaración outorgaría maior visibilidade á festa no calendario turístico galego, potenciaría a súa capacidade de atracción de visitantes e axudaría á súa promoción autonómica e nacional, ademais de pór en valor os seus elementos culturais, históricos e de participación cidadá.
O Concello conclúe que "esta XV edición marcou un antes e un despois", batendo récords e demostrando que a festa "está máis viva ca nunca". Agora, búscase que este crecemento se traduza nun recoñecemento que permita á celebración seguir medrando e proxectándose como un evento turístico de interese para toda Galicia.
